Brahman Shung samrat,Kanv Vansh evam Agnivanshiy Rajput,

Agnivanshiiy Rajput-

Puranon ke varnan ke anusar Ashok ke rajyakal me buddha dharma ka itna adhik balpoorvak prasar hua ki Hindu mandir nasht kar diye gaye, yagyadi hona band ho gaye, aur sanatan dharma ka aisa hashra dekhkar Shukla namak ek tapasvi brahaman ne Abu parvat par ek yagya kiya aur apne teen bhaiyon ke sahit kshaktriya dharm ki diksha li aur kai hajaron brahamanon ko kshaktriya banaya gaya…

       Prithviraj raso aur kai anya Rajput kaalin grantho me bhi isi baat ki pushti milti hai ki Mount Abu ke us yagya se chaar naye Rajput vanshon ki shuruat hui jo agnivanshiiy kshaktriya kahlaye. Ve char bhai aur unse jo char rajvansh chale unke naam the –

1 Pramar se Parmar vansh

2 chaphani se Chauhan vansh

3 pratihar se pratihar vansh

4 Shukla se solanki urf chalukya urf gaharwar vansh

Parmar ne Dhara nagri(Malwa), Chauhan ne Shakambhri/Ajmer(Rajasthan), Pratihar ne Kalinjar(Bundelkhand), Shukla ne wahin Abu parvat ko apna adhar sthan banaya evam shakti ekatrit karne me lag gaye.

Aitihasik Shung Brahman Vansh-

Ab ham aitihasik saboot dekhte hain to paate hain ki  Ashok ke samay to koi bada vidroh saamne nahi aata par uski mrityu ke kuchh hi dashak baad 185 BC me vidisha ka Pushyamitra Shung jo Magadh samrajya ka senapati tha aur Brahman tha wah Maurya samrat brahdrath ka vadh kar deta hai aur Maurya vansh ka ant ho jata hai. Wah Pushyamitra apne putra Agnimitra ko Magadh ka samrat banata hai aur khud senapti hi bana rahta hai….Iske saath hi shuruat hoti hai mahaan Shung vansh ki. Pushyamitra ne kai ashvmedh yagya kiye aur kai baar afghanistan tak Vijay abhiyan chalaye. Ye shungon ka hi prabhav tha ki us samay ke Greek(Yunani), Scythian(Shak), Persian(Pallav) logon ne bhagwat dharma apnana arambh kar diya tha…..is brahad ghatnkram ke wese to poore indian subcontinent me kai saboot milte hain par usme sabse ullekhniiy hai Vidisha ka Helliodorous stambh……Helliodorous Shung samrat bhagbhadra ke samay me Greek Bactrian samrat ka Rajdoot tha Magadh me aur Vidisha shung kaal me magadh ki dwitiiy rajdhani thi. Maurya kaal me dwitiiy rajdhani ka darja Ujjain ko prapt tha. Helliodorus ne apne kharch se Vidisha ke upnagar baisnagar me ek Vishnu mandir banwaya tha jiske saamne garud stambh lagwakar ye sari jankari likhwayi thi….Muslim kaal me wah mandir nasht kar diya gaya par angrejon ke samay me khudai me us garud stambh ka nichla bhaag phir mila aur wah tabse helliodorous stambh ke naam se prasiddha hai. Sthaniiy log uski khambaba (matlab khamba baba)ke naam se pooja karte hain.

Kanv Brahman Vansh –

Vasudev namak  ek Kanv vanshiiy brahman shungon ka  ek samant tha. Usne 72 BC me antim Shung samrat Devbhuti ki hatya kar di aur Kanv Vansh ki sthapna hui.

Satvahan Vansh –

Puranon me ye baat bilkul saaf shabdon me likhi hai ki Andhra vansh jo Satvahan vansh ke naam se bhi prasiddha hai…uski shuruat tab hui jab Andhra ke ek satvahan vanshiiy samant Shimuk ne antim Kanv samrat Susharman ki 27BC me hatya kar di aur ek swatantra shashak ke roop me rajya arambh kiya. Isse ek baat to sabit hoti hai ki Kanvon ka shashan kam se kam Bihar se Andhra Pradesh tak to tha hi.

             In satvahanon ko bhi kai itihaskar Brahmin hi mante hain par ye abhi tark ka Vishay hai.

Nishkarsh –

Is sab me jo ek baat nikalkar saamne aati hai wo ye hai ki Abu ke yagya ke baad Brahmanon ne Gupt Sainik sangthan banana arambh kar diye honge aur Pushyamitra Shug inhi sangthanon me se kisi ek ka sadasya raha hoga. Uske pad ke kaaran sabhi sangthanon ne use sarvmat se apna neta mana hoga evam apna sampoorna sainik samarthan diya hoga. Yahi kaaran tha ki wo poore uttar bharat aur dakshinapath tak me ashvmedh yagya karke kai yuddhon ka vijeta bana. Yahi karan hai ki parmar, chauhan, pratihar evam shukla vansh jo apne apne kshektron me paryapt shaktishali ho gaye honge par unhone swatantra rajya karne ki jagah Pushyamira ko apna Samrat mana aur matra samant ke roop me rajya karte rahe. Na sirf Shungon ke balki Kanvon  ke bhi samant rahe……..sirf Kanv vansh ke khatme ke baad hi Ujjain/Dhar ke parmar Raja Vikramaditya ne 27 BC me swayam ko samrat ghoshit kiya aur tabhi Vikram samvat ka arambh kiya jiska pratham varsh usne 58 BC ko maana jo ki vikramaditya ka janma varsh tha.